حلم الشعب والجيش ايد واحدة

حلم الشعب والجيش ايد واحدة

لماذا بعد هذه الشهور الطويلة تكون النهاية كالبداية بل أسوأ وأمر

ماذا فعلت هذه الأمة لكى يحكمها الطغاة دائما وتتحمل حتى نفاذ الصبر وعندما تثور يأتى المنقذ على فرسه

ليهتف الناس عاش المشير

الشعب والجيش ايد واحدة

لطالما تغنينا بهذا وفرحنا بجيشنا وبرجاله الأبطال حماة الوطن جوه وبره

كنا شايفين فيهم العزة والشرف والفخر كانوا الأمل فى مصر عظيمة كما حلمنا بها دائما ورسمناها فى الخيال

ضاقت النفوس ذرعا بالفاسدين ومبارك على رأسهم وخرجنا لنعلن انه لا بقاء لظالم بيننا وأخذنا حقنا ووضعنا كل ما نملك وحريتنا ووطننا المسلوب شبه المنهار فى يد هذا البطل الذى جاء على دبابة حاملا أعلام مصر وأحلام شعبها ودموع المظلموين ونعوش الشهداء وأقسم بالغالى أنه سيعيد الحق لأهله وفرحنا كثيرا

هذا هو البطل المشير محمد حسن طنطاوى

صرخوا بعض الناس وقالوا ده واحد من الحرامية

ده سرقنا وشارك فى دمار مصر سنيين طويلة

ده النظام القديم وحاميه مش حامى الثورة

صرخت مصر بكل شعبها انت اللى خاين طنطاوى مش خاين وحتى لو سرق زمان مسامحينه

ومهما عمل زمان مش مهم مادام هيجيب حقنا ووقف معانا

وفرحنا وروح كل واحد لبيته وهو مطمئن على مصر وحلمها وعلى حقه وعلى دم الشهيد

وشوية شوية تظهر حاجات مش كويسه ونقول مش مشكلة ياجماعة دى مش مقصودة يابلد طنطاوى والجيش معانا

ومرت الايام والشهور وظهر فجأة أقبح ما رأينا

انه وجه نظام مبارك الذى ثورنا من أجل مسحه تماما

قتلنا المشير وطاردتنا الشرطة وذبحتنا بمباركة ورؤية المشير وضوئه الأخضر

وأصبحنا نواجه البطش والغطرسة وسرقة البلد وحلمها والمهانة والذل والمحاكمات والطوارئ

لقد غفونا فترة طويلة لشهور لنصحو بعدها تانى أيام الثورة  اننا لم نكمل ثورتنا ولم ننه ثورتنا سنكمل اليوم ثورتنا

لكنها اليوم ضد المشير . ضد الحلم الجميل . ضد شعارتنا وأنفسنا . ضد الشعب والجيش ايد واحدة . ضد كل شىء عايز يسلبنا حريتنا وكرامتنا  ويحكمنا بالحديد والنار ويقتل من مصر أغلى شىء فيها

شكرا سيدى المشير

كانت هذه نهاية الحلم الجميل

حلم الشعب والجيش ايد واحدة

يعنى ايه كلمة وطن

يعنى ايه كلمة وطن

وطن تعنى أعيش بأمان

أعيش تعنى مسكن ومأكل وتعليم مناسب وعمل وحياة كريمة

أمان تعنى حماية جيش لحدود بلدى وشرطة لتأمين الحياة الكريمة وتطبيق القانون

هى دى كل مطالبنا فى الحياة

والله العظيم مش عايزين حاجه أكتر من كده

كل اللى عايزينه وطن

جوه كل واحده من دول شوية حاجات بسيطة هاوضحها وهاوضح معناها وايه مشكلتها الحالية فى مجموعة مقالات

ودى أبسط حقوقنا كمواطنين نعشق تراب هذا الوطن ونحس بحبه ونجد كل الكره والظلم من حكامه

هدف مدونة مصر المستقبل

مدونة مصر المستقبل هى أول مدونة شخصية لى ولا أسعى لاى مكاسب من خلالها

كل اللى عايزه هى انى اشوف مصر العروبة فى وضعها اللائق ومنزلتها التاريخية وسط شعوب العالم

ده أبسط حقوقك يامصر علينا وده واجب قومى لكل واحد عاش على أرضك وشرب من نيلك

كل ما أفكر به هو مصر ومستقبلها

وذلك لان مستقبلنا جميعا كمصريين وكأمة عربية وأمة اسلامية هو مستقبل مصر كان كذلك فى كل فترات التاريخ وسيظل الى ان يرث الارض ومن عليها

لقد ولد التاريخ هنا وتعلم القراءة والكتابة فى هذه البقعة التاريخية ولهذا كان التاريخ دائما ابنا لمصر وشعبها

وأول ما سطر التاريخ سطر تاريخ مصر وشعبها

للأسف رحل التاريخ زى ما كتير من ولادها بيرحلوا من زمن طويل مش لأن مصر باعت ولادها

بس لان مصر حكمها شر أولادها وأخونهم لمصرهم وعروبتهم ووطنهم

رحل التاريخ من ظلم البشر

رحل لأنه اتعلم عندنا ان الملك والدولة أساسها الحرية والعدل

وان مفيش حضارة بتقوم على الظلم والفقر والجهل والخيانة

رحل العلم ومن بعده رحل العدل ومن بعدهم رحلت الأمانة ومن بعدهم سقطت الدولة

ضاعت حضارة وانكسرت كرامة وانطفأت الانوار وانهان الشعب وساد الفقر والجهل والمرض والتخلف

سامحينا يامصر

احنا أسوأ أبناء لأفضل وطن

ولو رحل كل الشرفاء والعلماء ولو مكنش فيكي غير الخونة والفجار عارفينك يامصر ولادة

مستنيين ابن مخلص من ولادك يحررنا  ويرجعلك حقوقك

وفى انتظار هذا القائد

سأكتب منددا بكل مفسدة وظلم ودمار بأرضك

سأكتب عن مشكلاتك وظلم أهلك

سأكتب كيف ستعبرين هذا الظلام لنور العلم والحضارة

سأحلم بمصرمتحضرة متقدمة منيرة بشعبها وحكمها مفخرة كل الأمم وقبلة العاشقين ترابك يامصر

ليست أحلاما انها وصف لمصر الحقيقة التى ستأتى مهما طال الزمان